Monday

19.9.1977

Priya Akhilji,

Aap ka 8 taareekh ka likha hua khath mujhe mila. Padkar bahut khushi hui. Dil ko tassalli mili. Lekin Akhilji aapke dilki baatein jaankar mujhe khudh hii sharmindagi mehsoos hone lagi hai. Aap kitni samajhdhar hai, kitni achi hai. Duniya ke utaar chadav ke baare mein aap kitna sukshma vichar rakhti hai. Aap ne mujh jaisi insaan ki baaton ka zara sa bhi bura na maankar mere dil ki baat jaan ne ki icha prakat ki hai. Sach maaniye Akhilji meine pichla khath aapko likha sahi lekin aap ka khath paane tak mere dil mein ek toofaan sa utha tha. Mein apne aapko aparadhi samajhne laga tha. Zameen par rehte hue bhi meine aasmaan ko choone ki koshish ki thi. Mein apni khud ki haisiyat bhool gaya tha. Baat yeh hai Akhilji ki mein-----Aap se pyar karta hoon. Woh bhi foreign aane se pehlese hi. Lekin meri paristhithiyaan, dharm, samaj aap se bilkul alag tha isliye mein India mein rehte hue janm bhar aap se kabhi bhi shayad yeh baat nahin batha saktha tha. Aur na hi aaj batane wala tha, lekin aap ki Frank baatein jaankar meine socha ki aap sachmuch mujhse naaraaz nahin hogi. Kyunki aapne likha tha “Perhaps I will be able to understand you”. Waise meine bhi socha ki aap itna zaroor janthi hogi ki kisi ko kisi se pyar hona koi apraadh ya gunah tho hai nahin. Lekin mein yeh bhool gaya tha ki kisi se pyar karne ke liye kum se kum apni haisiyat tho honi chaahiye. Aur mein apni haisiyat vakai bhool gaya tha. Waise duniya mein kai log aisa pyar karte honge, lekin zaroori nahin ki unko unka pyar miltha hi hoga. Mein abhagene kyun yeh soch rakha tha. Aap sachmuch mujhe iss gusthaki ke liye kshama kijiye Akhilji. Bhagwan ke liye mujhse kabhi nafrat na kijiye. Mere dil mein aap ke liye bahut izzat hai, ek pavitra bhavna hai. Aur han aap apne ghar ke kisi bhi aadmi se yeh nahin batana, varna Masterji mujhpar bahut naaraz hongue. Woh sochengue iss ladke ko hamne hamdardi di aur isne hamari hamdardi ka yeh matlab nikala? Kripaya aap nahin bataye. Aasha karta hoon aap mere shabdon ke liye zaroor kshama karogi aur iss khatka jawab bhi degi. Baaki sab kushal mangal hai. Gopal ko bhi aathe hi achi naukri mil gayi hai. Ab Anita koi kaam vagairah nahin karti, sirf hum logon ke liye khana banathi hai aur bahut sukhi baiti hai. Shayad aaj hi aapko khath likhne wali. Gopal bhi bahut khush baita hai.

Aap ke gharwalon ko hamari taraf se saprem namaskar kahiyega. Aur aap ko bhi hamari taraf se kind regards.

Nothing more to add further. Only awaiting for your reply very anxiously. Hope you will keep continue to write letters very frequently. Keeping a great desire in my mind that you will never hate me but will try to understand me.

Yours unfortunate Govind.

Ek baat likhna tho mein bhool hi gaya hoon. Jiske liye aap ne bahut chinta vyakth ki hai, aap ke pichle khath aakhri sentence ke liye jismein likha tha: “Tumein mera pyar” yaane ki “I love you” jo mein abhi tak padtha hi rehta hoon. Jiske liye abhi bhi mein aap ko dhanyavad de raha hoon.

Doosri baat yeh hai ki apne gopal ke through bheje hue kele mile jo mujhe duniya ki sabhi cheezon se meethe lage.

//Shree//

(Monday), 27.6.1977

Priya Akhilji,

Aapka 7 june ko likha hua patra mila aur meine samasth samachar pada. Ek baar-do baar-teen baar pada aur padthe hi raha. Dil ki duniya mein khushi ki bahar aa gayi, jaise doobthe ko thinke ka sahara mila. Registhaan mein apni manjhil ki khoj mein nikle hue raahee ko achanak paani dikhayi padne par jis tarah ki khushi mehsoos hoti hai, kuch usii prakar ki khushi ko meine anubhav kiya. Purani yaadein, apne desh mein bithayi hui sthithi ki yaadein mere dimaag ke saagar mein leharon ki tarah machalne lagi. Leharon ka machalna shaanth ho gaya aur meine dil ki nazron se dekha aapko – Air Hostess ke roop mein ¡ Air-Hostess ek panchikisi zindagi, aakash ke saagar mein aap idhar tho kal udhar, bade bade hawai-jahaz, sandhya ka suhana vathavaran, Jambo ki seediyon par aap muskurathe hue aane wali yaatriyon ka swagath kar rahi hai. Kuch isi prakar ke drishya meri nazron ke saamne chakkar kaatne lage. Sach maaniyega Akhilji kitni pyari life hai Air-Hostess ki. Zindagi mein kitna adventure hai. Waise ek prakar ki routine life tho har koi kartha hai, jaise ghadiyaal ki do suiyoon ki tarah 12 bajne ke baad phir 1-2 se shurwaath hokar phir 12 bajthe hein. Khair chodiye iss baat ko, mein nahin jaantha aapko yeh job kyun nahin acha laga. Shayad aapne iska ek hii ang dekha hai jo aapko aur maami ko acha nahin laga. Waise mein maami ki bhavnaon ka bhi aadar karta hoon. Har maa baap ko apne santaan ka bhala bhura tho samajhtha hii hai. Isliye mein kuch nahin kahunga, shayad itna kehne ka adhikar mujhe nahin hai. Lekin yeh zaroor kahunga ki, you are loosing a best opportunity, that you never get.

Ajay ji exam nahin de sake jaankar dukh hua, waise ab unke aankhon ki sthithi kaisi hai? Aur aap ke ghar mein jo 2 aadmi hamare ghar ka address maang rahe the unka naam gaam ya aatha patha aapne pucha hii hoga, woh mujhe likhna. Gopal ki taraf se ab tak jawab nahin aaya hai.

Mujhe yeh jaankar bahut khushi hui ki aap mujhe bahut kuch likhna chahthi hai aur woh bhi Inland ke badle cover mein. Waise yahan par tho Letter writing ke liye special pad milta hai. Magar aap ek kaam kar sakti hai. Stress Paper Pad lekar uske page ke neeche application paper of lining rakh kar letter likh sakti hai aur ek foreign envelop milta hai usmein dalkar bhej sakti hai. Stress Paper ka vazan kum hoga isliye charge kum lagega.

Mein bhi aap ko bahut kuch likhna chahtha hoon, lekin ab dimag hii kaam nahin kar raha hai aur dartha bhi hoon shayad aap kabhi mujhe galath samajh baite. Mere liye kitni bhagya ki baat hai ki aap mere har khath ka jawab deti hai. Waise ek baat zaroor kahunga, aap ne Air India ke Application ke liye jo photo khinchwayein hein, agar ethraaj na ho tho mujhe ek zaroor bhejiyega. Anita ne bhi kaha hai ki aap photo zaroor bhejein.

Iss khath ke 2 din pehle hii meine aap ko yahan ki famous mithai bheja hai jise Turron De Almendra kehthe hein. Shayad aapko pasand aayegi. Agar 2,3 din baad aap ko ek Ladies Umbrella bhej raha hoon. Mein bhool hi gaya tha ki ab India mein varsha ke din hai. Aasha karta hoon aap ko duty na bharni padi. Ek din jab mein India mein tha tho maami ne kaha tha ki “Akhil “ ke liye ek chatri chaahiye. Aap receive karne ke baad mujhe khabar dena.

Ab sochta hoon ki baaki matter agle khath mein aap ka jawab paane ke baad likhun. Waise iss baar aap mujhe zaroor cover mein khath likhegi. Aur usii khath ke intezar mein----

Aap ka

Govind

Masterji aur maami ko mera sadar pranam kahiyega aur Ajay ji ko saprem namaskar. Awaiting for your reply very anxiously. Please excuse me if I have written anything odd unknowingly.

18.8.1976

//Shree//

Aadaraneeya krishnan saheb,

Govind ki oor se appko sadar pranam. Aap ke aashirwad se mein kushal purvak apni behen ke paas Las Palmas mein pahunch gaya. Aap ke ghar se nikalne ke baad Santacruz Airport par hi mein samay se 4 ghanta pehle pahunch gaya. Waiting room mein baita. Us waqt saamne se 2 C.I.D officers jo airport mein custom ki checking karte hein, woh jaa rahe the. Unke paas cigarette na hone wajah se weh dono pareshaan ho gaye the. Meine dekha aur unko cigarette pesh ki, unko bahut khushi hui. Unhone meri puchtach ki. Kahan jaa rahe ho? Kitna saaman hai? Vagairah vagairah! 12 baje announcement hui aur humlog yan mein aur doosre passenger jo flight 103 ke the andhar chale gaye. Wahan par kareeb kareeb 1.30 ghanta checking hoti hai, pura saaman kholkar check karte hein phir apne ko pack karna padtha hai. Un C.I.D. officerne kaha ki yeh mera aadmi hai. Meri kuch bhi checking nahin aur mein bina kisi museebat se plane pahunch gaya. Jaise hi plane mein kadam rakha , airhostess haath jod kar swagat ke liye khadi thi. Meine bhi haath jodkar usse abhivadan kiya. Andhar jaakar dekha tho aise laga jaise Tajmehal ke room mein hoon. Bas chota dikhne wala plane andhar se kaafi lambha chauda tha. Teen-teen seaton ki teen choudi kathar thi. Meri seat kidki ke kareeb thi. Mere baaju mein ek foreigner baita tha. Jab raat hogayi tho sab log seat ki bajuaon ko upar karke palang bana kar soo gaye, lekin mere baaju k ajo foreigner baita tha woh bahut aswasth ho raha tha kyunki usko soneka tha. Meine usko kaha, “do you want to sleep sir??” Tho usne kaha “yes”, but where will you go? Meine doosri katharki khaali khursi ki taraf ishaara karthe hue kaha “there”. Woh bechara bahut khush hua phir Rome tak jaane tak usne mujhe har baath mein madath ki. Bahar se itna shor karne wala plane andhar se bilkul shaanth hota hai. Aakash udthe samay bilkul hiltha dhultha  nahin hai. Aise lagta hai, jaise ekhi jagah par khada hai. Khaane ke samay bahut maza aaya, sablog kaanta, chamach aur churi se khana khane lage, tho meine airhostess ko vegitarian food ka order diya kyunki woh India ki hotlon mein kaante chamche se khane ki aadat thi. Baaki sab log mutton wagairah churi ke saath khaa rahe the tho mein bhi unka saath de saka. Phir Rome ke aage Madrid se lekar Las Palmas tak meine khana hi nahin khaya kyunki khane ko taste hi nahin thi, sab feeka lag raha tha. Paani tho mujhe Las palmas tak mila hi nahin. Jab pyaas lage tho coffee piyo, iss tarah mein apne ichith jagah tak pahunch gaya. Jab Las Palmas mein do, teen, din ghooma tho bahut maza aaya. Bilkul modern country hai. Yahan par chota-bada, oonch neech ka koi bhedbhaav nahin, yahan ke log bahut hi ache mizaz ke hein. Aur aadha shehar tho Indian Sindhiyonse bhara hua hai. Kamane ko bahut sources hai. Agle hafte tak mein kaam par chadunga. Starting salary 1500 Rs. hoga. Wholesalers se mal lekar Retailers ko supply karna mera kaam hoga. Thodi din bhaasha aane tak, zara taqleef hogi kyunki yahan angrezi kisiko bhi nahin aati. Spanish hi chalti hai. Aur bahut kuch likhne ka reh gaya hai baaki doosre khath mein likhunga.

Aasha hai aap sablog iss letter ko padengue aur jald hii jawab bhi dengue. Maami ko mera sadar pranam aur Ajay Akhil ko saprem namaskar. Aapka chahtha Govind.